Hauteskunde kanpaina Berria Egunkarian

Berria egunkarian hauteskunde kanpainari buruz argitaratu diren informazio, argazki edota analisi politikoen protagonista nagusienak gizonak izan dira, banaka (%59) edota talde mistoetan agertzen baitira. Emakumeen presentzia %21 izan da.

Berriak oreka mantendu du hautagaiei egindako elkarrizketetan, baina kanpainaren informazioen titularretan emakumeen presentzia anekdotikoa izan da.

Argazkietan gizonen presentziak (30) emakumeena bikoizten du (15), talde argazkiak albora utzita

Baina, nortzuk izan dira agertu diren 21 emakume horiek? Psoe eta EhBilduko lau hautagai agertu dira protagonista moduan, eta beste 3 Podemosekoak izan dira. Beste hamarrak alderdi katalanen hautagaiak edota alderdietatik kanpo dauden emakumeak izan dira. VOX; Ciudadanos, PP eta EAJ/PNV alderdietako hautagai emakumerik ez da agertuBerrian egun hauetako orrialdeetan, edo agertu direnean taldean izan da.

Advertisements

Genero-estereotipoak, kanpainako bideoetan

EAJren spot-ean, Aitor Esteban hautagaia da protagonista. Emakumeak agertzen dira, baina rol estereotipazuetan: Aitor Estebanekin topatzen den auzokoa edo kontsultan dagoen gaixoa. Langileak, ikertzaile eta medikua, aldiz, gizonezkoak dira.

Hautagaitzaren gizon-emakumeak ere agertzen dira, baina, esan bezala, hautagairengan zentratzen da iragarkia, eta hau gizona da.

Off ahotsa hautagaiak jartzen du (gizon-ahotsa)

EH Bilduren kasuan, gizon eta emakumeen agerpena parekidea den arren (Kongresurako zerrendaburuen artean 2 emakume eta 2 gizon daude), genero-estereotipoak ere topatzen dira: emakume dendaria (elikadura arlokoa eta amantala jantzita) eta gizon langilea (lan-buzoa soinean). Umea besoetan duen “ama” rola ere topatzen dugu familia normatibo batean (ama-aita amona-aitona).

Off ahotsa gizonezkoak jartzen du.

Elkarrekin Podemos-en spotean irudi asko ditugu. Lehenengo partean, krisiaren inguruan ari direnean, emakumeak negarrez agertzen dira  plano guztietan, eta gizonen protagonismoa nabaria da politika arloan (agertzen den emakume bakarra Angela Merkel da). Bigarren partean, Podemos-en gizonen protagonismoa  handiagoa da emakumeena baino aukeratutako irudietan… Amaitzeko, berriz, Pablo Iglesias agertzen da, alderdiko presidentegaia, gizona hau ere.

Off ahotsa ere gizonezko batena da.

Zortzi emakume eta bi gizon agertzen dira PSOE-ren spotean; bakoitzak bere hizkuntzan esaldi bat esaten du. Azkenean, Pedro Sanchez agertzen da; “El 28 de Abril, haz que pase, por la España que quieres” kamarari esaten dio. Agintera erabiltzen duen bakarra da. Protagonismoa berriz ere presidentziarako hautagaiarena (gizona) da.

PPren spotean emakumezkoaren ahotsa entzuten dugu off-ean. Horretaz gainera, bikote heterosexualak, gizon abeltzaina, “aita harroa”,  emakume jubilatu aisialdian, eta “aitite” bilobarekin, emakume zerbitzaria… Negozio-gizona lokal bila zentroan; emakume salatzailea (loradenda eta amantala jantzita); hau da, estereotipoak maiz agertzen dira, nahiz eta gizarteak bereganatu dituen rol aldaketa batzuk nabariak diren (umea besoetan duen gizona edo bilobarekin -neska- futbolaz ari den “aitona”).

PACMAren spot honetan, indar handiko lokuzioa duen emakumeak gidatzen du iragarkia… Manadari erreferentzia egiten dio zuzenean, baita matxismoaren beste espresioei ere… Horretaz gainera, bi bikote ez-normatiboak agertzen dira. Izan ere, soilik bideo honetan topatu ditugu arautik kanpoko diskurtsoak. Emakumearen (kalean)  eta gizonaren (zaraman zerbaiten bila) irudia du pobreziak, eta gizon migrantea agertzen da. Mugimendu feministak ere paper garrantzitsua du, “gaizkiaren” blokean gehienak gizonezkoak diren bitartean (Soraya Saenz de Santamaria agertzen den emakume bakarra da).

Umeak erabili dituzte Ciudadanos alderdiko komunikazio-arduradunek, bikote heterosexualak “iratzartzen” dituzten neskak eta mutilak. Ondoren, presidentegaiak (gizona) hartzen du protagonismoa, mitin batean, “Vamos ciudadanos, vamos España” esaldia esaten duena, musika “handia” atzean.

Beraz, lehenengo azterketa batean, nabarmentzen da alderdiak ez direla genero-estereotipo eta heteronormatik ateratzen, eta lidergoa gizonezkoen eskuetan -hautagai nagusian zentratuta- jarraitzen duela izaten ia gehienetan (salbuespena, PACMA, EH Bildu eta PPren spotetan). Eskuekin lan egiten duen langilea oraindik gizonezko itxura du (EAJ, EH Bildu, PP) eta emakumeen negozioak 1. sektoreari (“Ama lurrari?”) lotuta daude (frutadenda, EH Bildun; loradenda, PPn). Gurasoak agertzen direnean ere gizon-emakumeek osaturiko bikotetan ordezkatzen dira.

PACMA-ren bideoak soilik “arautik kanpoko” bi bikote azaltzen dira: bi gizonena eta Down sindromea duten gizon-emakumeek osatutakoa.

Maite Albiz Emakumeen Dokumentazio Zentroaren web berria

Bilboko Maite Albiz Emakumeen Dokumentazio Zentroak webgunea berritu du kontsultak arindu eta errazteko asmoz.

Katalogo digitala eta zentroari buruzko informazio gehiago kontsultatzeko helbidea honakoa da: http://emakumeak.org/web/

Zentroa Bilboko Pilota kaleko 10.ean (Poltsa eraikinean) kokatuta dago, eta astearte, asteazken eta ostegunetan arratsaldez (16:00etatik 20:00etara) eta ostiraletan goizez (10:00etatik 14:00etara) publikoari irekitzen zaio.

Emakumeen Ikusgaitasuna Hedabideetan biltzarra, urriak 17 eta 18 Gizarte eta Komunikazio Zientzien Fakultatean

Urriaren 17 eta 18an (astezken eta osteguna), emakumeok hedabideetan dugun presentziaren inguruko gogoeta egiteko aukera egongo da UPV/EHUko Gizarte eta Komunikazio Zientzien Fakultatean. Bi egunetan zehar izango diren hitzaldietan zein eztabaidetan, emakumeok hedabideetako kirol, politika edo iritzi sailetan dugun presentzia, komunikabideek eta publizitateak nola aurkezten gaituzten edo zinemaren industrian dugun tokia izango dira aztergai egongo diren gai batzuk. Horietaz gainera, komunikazioen atalean, Estatuko zein Nazioarteko unibertsitateetan egiten ari diren ikerketa batzuk ezagutzeko aukera izango dugu.

Gehiago jakiteko, kongresuaren webgunea ikus daiteke.

Parte har daiteke asistente moduan, horretarako nahiko da izena-emateko orrialdea bete; saioetako %75era doazen ikasleek asistentzia-agiria jasoko dute. Hala ere, badago aukera edozein hitzaldira sartzeko.

Hitzaldiak Gizarte eta Komunikazio Zientzien Fakultateko Auditorium-ean izango dira.

Berrogeitahamar urtetik gorako gizona, EITBko irrati-tertuliakidea

Irailaren 10ean denboraldi berria hasi zen EITBko irratietan, eta horrekin batera tertuliak itzuli dira programaziora. Aldaketa handirik ez emakumeen presentziari dagokionez, eta aurreko denboraldietako kopuruetan mugitzen gara. Izan ere, batez beste, emakumeen presentzia % 33,33 izan da Euskadi Irratiko Faktorian; % 26,66 Radio Euskadi-ko Ganbaran eta % 21,11 Boulevard-eko Dialogos tartean.

Denboraldi berrian emakumeen ahotsak sartu diren arren -Ainhoa Etxaide, Charo Zarzalejos, Cristina Ruiz…, besteak beste-, gizon berrien (gehi zirenen) gehitzeak mantentzen du genero-arrakala.

Euskadi Irratiko goizeko tertulian, 12 gizonek eta 6 emakumek parte hartu dute iraileko hamabost saioetan. Boulevard-ean, berriz, 18 gizonek eta 6 emakumek; eta Ganbaran, 15-ek eta 7-k.

Soslaiari dagokionez, ia gehienak Hego Euskal Herrikoak dira (bereziki, EAEkoak); bakar bat Ipar Euskal Herrikoa eta bost espainiar Estatukoak. Ganbarako tertulia politikoan parte hartzen duten guztiak kazetariak dira; eta gainerakoetan, aldiz, kazetariez gain, politikariak (aktiboan zein ez) eta kultur arloko profesionalak (irakasleak, idazleak) zein gizarte-aktibistak topatzen ditugu.

Adinean erreparatzen badugu, batez bestekoa 52,5 urte inguruan dago (Faktorian ia 56 urte) eta 30 urtetik beherako tertuliakide bakarra (% 1,6) topatzen dugu, Ganbaran; 60 urtetik gorakoak, berriz 13 dira (% 28).

Azkenik, esan beharra dago irailean emitituriko Parlamento en las Ondas debatean (Crónica del Fin de Semana saioan), emakumeen presentzia handitu dela aurreko denboraldiarekin alderatuta: 15ean, PPko ordezkaria izan zen emakume bakarra; 22an, EAJ, Podemos eta PP-ko ordezkariak izan ziren emakumeak, eta 29an, aldiz, Podemos, PSE eta PPkoak. Batez beste, emakumeen presentzia % 48,33koa izan da eztabaida politiko horretan, Legebiltzarrean dagoen ordezkaritzara hurbilduta.

Denboraldi berrian jarraitzen dute Más Que Palabras saioko “A tres bandas” tarteak eta emakume politikari ohien mahaiak Ganbaran. 

Denboraldi berria ETBko tertulietan, emakume gehiago baina ez guztietan


Denboraldi berriari ekin diote EITBn, eta horrekin batera gure neurketak ere hasi dira. Esan beharra dago nabarmena dela egiten ari den ahalegina tertulietan emakumeak egon daitezen, eta horren ondorioz, parekotasunez hitz egin dezakegu azterturiko hiru mahaitan: egunero ETB1-ean (18:00) eskaintzen den Ahoz Aho saioko eztabaidan (emakumeak partaideen ia % 55 dira), astean behin egiten den Ahoz Aho +-ean (% 44,44) eta ETB2-n egunero (11:30) ematen den En Jake saioan (% 48,68).

Txanponaren beste aurpegian, ordea, dugu Klaudio Landak arratsaldero ETB2-n gidatzen duen Esta Pasando tertulia (%28,33). Hala ere, honetan aldaketa txiki bat, ez-nahikoa, nabaritu izan dugu azken hilabeteotan, eta egon badaude emakume bat baino gehiagoren presentzia duten mahaiak (bi alditan, 3 gizon eta 3 emakume); dena den, horiek baino ohikoak izaten dira emakume bakar batek eta bost gizonek osatutakoak.

Goizero (9:00) ETB1ean aireatzen den Egun On Euskadi saioan, hiru pertsonek osatzen dute mahaia, eta irailean lau alditan ez da emakumeren ahotsik eskaini, gainerako guztietan, aldiz, emakume bakarra izan da. Horren ondorioz, emakumeen presentzia txikiagoa duen telebista-eztabaida izan da lehenengo hilabete honetan (% 24,44).


Zurien nagusitasunaren apologia ETBn?

[IRITZIA]

Imajina dezagun telebista publiko batean ostiralero eskaintzen den iritzi-saio batean, pertsona beltz batek jasandako eraso bortitzaren inguruan eztabaidatzen ari direla. Imajina dezagun, saioko arduradunek zurien nagusitasuna defendatzen duen aditua gonbidatzen dutela, iritzi ezberdinak entzun behar direlako ustean oinarrituta. Ezin imajinatu, ezta? Kode deontologikoaren kontrakoa litzateke arrazismoaren apologia egiten duen pertsona baten aldarrikapena jasotzea, ezta?

Jar dezagun pertsona beltz horren ordez, emakumea (beltza izan daitekeena), eta jipoiaren ordez, bortxaketa; eta arrazismoa justifikatu ordez, sexu-erasoa kolokan jartzen duena, edo erasoaren erantzukizuna emakumeari berari leporatzen diona, emakumeek ere erasotzen dutela aitzakiatzen duena gonbidatzen dugula, kazetaritza irizpideetan justifikatuta. Onargarria?

Hori da, hain zuzen ere, ETB2-k ostiraletan emititzen duen 360º Tú Decides saioan gertatu zena maiatzaren 11ko saioan, San Ferminetako bortxaketaren biktimaren datuak eman ez ezik, bere testigantza kolokan jarri duen Tribuna de Cartagena-ko zuzendariari ahotsa eman zitzaiola; saio berean, emakumeak ere bortxatzaileak direla eta salaketa faltsuen argudioa azaldu zituen abokatu baten azalpena jasan behar izan genuen. Aurretik ere, apirilaren 28an, kazetaritza irizpide berberak erabilita, La Manada delakoaren defentsaren abokatuaren testigantza eraman zuten programara, Euskal Herriko kaleetan zegoen aldarriari muzin eginez.

Eztabaida, iritzi-trukaketa eta analisia omen dira saioaren helburuak, eta ez morboa, ikusgarritasuna eta polemika; eta kazetaritza irizpideen arabera aukeratzen dira gonbidatuak, gaurkotasunari begira. Horrela izanda, nola uler daiteke, emakumeak gutxiesten –saioan bertan agerian geratu zen legez- dituztenen iritzia jaso ez ezik, galderarik ez egiteko konpromisoa hartzea, hau da, zentsura onartzea, kazetaritza irizpideen arabera? Nola onartu emakumeekiko mespretxua (aurkezlea kazetaria zen zalantzatan jartzeaz gainera, berarekiko jarrera paternalista mantendu zuen elkarrizketan zehar) nabarmen agerian jarri zuenari bozgailua eskaini hedabide publiko batean?

EITBk sinatu duen “Publizitate eta komunikazio ez sexistarako kode deontologikoa eta auerregulaziokoa” delakoan jasotzen denez, hedabideek honelako konpromisoa hartzen dute: baztertu emakumeen aurkako indarkeria motaren bat dakarten argudio, esamolde eta irudiak. Saihestu emakumeen kontrako edozein indarkeria mota dakarren jokabide nahiz jarrerak erabiltzea edo justifikatzea”. Eta hori izan zen, hain zuzen, gertatu zena, emakumeekiko indarkeria justifikatzen dutenei ahotsa eman zitzaien, erantzuteko aukerarik gabe, gainera.

Arantza Gutierrez Paz

 

Emakumerik gabeko (ia) eztabaidarik ez, baina gizonak nagusi apirilean ere

Egun on Euskadi (ETB1) saioko eztabaida mahaian, ia egunero, hiru tertuliakideetako bat emakume izan ohi da; apirilaren 10ean ez zen emakumerik izan, aurreko egunean, ordea, denak izan ziren emakumeak. Gainerako saioetan, berriz, soilik bitan izan dira gehiengoa emakumeak. Elkarrizketatuen artean, apirilean izandakoen artean 5 emakume eta 11 gizon zenbatu ditugu.

Euskarazko kanalean, Ilazki Serrano eta Amaia Cayerok gidatzen duten Ahoz Aho saioak jarraitzen du izaten parekideena, nahiz eta asteroko eztabaidan, Ahoz Aho +, apirilean zehar, emakumeen presentzia tertuliakideen herena izan den.

ETB2ra jotzen badugu, emakumeen portzentaiak txikiagoak dira, nahiz eta honetan ere azpimarratu behar den Klaudio Landak zuzentzen duen arratsaldeko tertulian, LQEP, emakumeen presentzia areagotu da, nahiz eta oraindik parekidetasunetik oso urruti dagoen.

   

Astean behin, ostiraletan, eskaintzen den 360º Tú Decides saioan, berriz, emakumeen presentziak nabarmen egin du behera. Azpimarratu behar da, gainera, saio horretan gizonak nagusi izan ohi direla gonbidatuen artean eta, askotan, agertzen diren emakumeak oso rol estereotipatuetan agertzen direla (amak bereziki). Ezin ahaztu, gainera, apirilaren 27an, Agustin Martinez Becerra “La Manada” delakoaren kide batzuen abokatuari emandako protagonismoa.

2017/18 ikasturteari dagokionez, hauxe da emakumeen presentziaren eboluzioa  (%etan) Euskal Telebistako tertulia nagusietan:

Emakumeen presentzia nabarmen jaitsi da EITBko irrati-tertulietan otsailean

Goiko grafikoan ikus daitekeenez, Radio Euskadi-ko Boulevard saioan izan ezik, emakumeen presentzia nabarmen jaitsi da bai erdarazko katean gauero emititzen den Ganbaran (-%9.2) bai Euskadi Irratiko Faktorian (-%4).

Dani Alvarez-ek gidatzen duen Diálogos tertuliari dagokionez, ez da aldaketarik izan; hala ere, eztabaida-mahaian oraindik emakume gutxien gonbidatzen dituen saioa da.

Hurrengo grafikoetan ikus daitekeenez, otsailean ere izan dira emakumerik gabeko tertuliak izakunde publikoko irratietan (25), eta bakar bat non gizonik ez zegoen; gizonak gehiengo dira beste 26 saiotan eta emakumeak, ordea, bostetan.

Telebistari dagokionez, euskarazko kanalean eskaintzen den Ahoz Aho eta Ahoz Aho + dira saio parekideenak. Astero eskaintzen den eztabaidan, bikoiztu da emakumeen presentzia urtarrileko zifreekin alderatuta. Azpimarratu behar da, Ilaski Serrano eta Amaia Cayerok gidatzen duten programa honetan emakumeen presentzia nabaria dela gonbidatu eta adituen artean. Era berean, beste solasaldi ereduak eskaintzen ditu Ahoz Ahok zeinetan iritzi publikoan eragin handia duten gaiak modu sakon eta lasaian tratatzen diren, eta horietan ere nabaria da emakumeen presentzia. Izan ere, honek eramaten gaitu planteatzera ea tertulia edo “orojakinen” eztabaida eredua egokiena den emakumeen parte-hartzea bultzatzeko.

Kate berean goizeko ordutegian eskaintzen den Egun on Euskadi programan, berriz, nabarmen jaitsi da emakumeen presentzia eta egun askotan ez dago emakumerik iritzi-mahaian. Gauza bera gertatzen da En Jake saioan, zeinetan batez besteko emakumeen presentzia %32,5 izan da. Parekidetasunetik urrutiago, ohi bezala, dugu Klaudio Landak zuzentzen duen saioa (orain Lo que está pasando izenaz); honetan, emakumeen presentzia % 29,38koa izan da 2018ko otsailean.

Astero, ostiral gauean, eskaintzen diren 7 Días eta 360º 50 responden saioetan, emakumeen presentzia % 40, 83 izan da. Dena den, gonbidatu eta adituen kopuruan erreparatzen badugu, portzentaia askoz txikiagoa da.

Emakumeen ahots gutxi espainiar Estatuko egunkarietan

Federación de Asociaciones de Periodistas de España (FAPE) delakoak argitaratu berri duen ColumnistAs izeneko ikerketan argi geratzen da emakumeok baztertuta gaudela egunkarietako iritzi-orrialdetan espainiar Estatuan.

Hego Euskal Herriko egunkarietan ikerketa-talde honek egindako analisiaren datuekin bat datoz 2018ko urtarrilean burutu den aipaturiko azterketa horren emaitzak.  Izan ere, argitaratutako artikuluan azaltzen genuenez, EAEn eta Nafarroan publikatzen diren egunkarietan, batez beste, sinaturiko iritzi-artikuluetako %21,71 dira emakumeek idatzitakoak, Estatu espainiarrean egindako ikerketak ezarritako kopurua baino 0,71 puntu altuagoa.

Ildo berean, 25 egunkariren web bertsioetako iritzi-orrialdeetan  urtarrilean plazaratu diren iritzi-artikuluen inguruan egindako azterketaren arabera, El Diario. es eta El Periódico egunkariak dira parekideenak; hurrenez hurren, artikuluen %40 eta % 39  sinatzen baitute emakumeek. Gurean, aldiz, hilabete berean, parekideena Berria izan da, zeinetan artikuluen % 33 emakumeek sinatuta den.

 

2018an jarraitzen dugu parekidetasunik gabe ETBko tertulietan

Urtearen hasierakin ez da parekidetasuna heldu Euskal Telbista-ko eztabaidetan. Ez dago saiorik zeinetan jendarteak ematen den ordezkaritza (%49, gizonezkoak – % 51, emakumezkoak) ematen den, eta soilik bi saiotan, Ahoz Aho (% 47,22) eta En Jake (%40,68) lortzen da 4/2005 Emakumeen eta Gizonen arteko Berdintasunerako Legean ezartzen den parekidetasun-kopuruetan (60-40) egotea.

Goizeko saioei dagokienez, Estepan Aldamizek goizeko 9etan zuzentzen duen solasaldian, Egun on Euskadi emakumeen presentzia % 31,48 izan da, hau da, gizonen parte-hartzea bikoiztu du emakumeena. Azterturiko egunetako hirutan ez da emakumerik egon, eta bakar batean soilik ez da gizonik egon; gainerako guztietan, batean izan ezik, mahaian emakume bat eta bi gizon eseri dira.

Xabier Lapitzen programan, En Jake, emakumeen presentzia errekuperatu da, eta 2017ko martxoan ziren kopuruetara itzuli da. Oreka mantentzen saiatzen da, baina oraindik parekidetasuna ez da erabatekoa.


 

 

 

 

 

 

 

 

Arratsaldeetan, aurreko hilabetetan bezala, El Programa de Klaudio saioa parekidetasunetik oso urruti dago (% 26,81), eta normalean emakume bat eta bost gizonek osaturiko mahaiak eskaintzen ditu egunero. Arratsaldeetan, euskarazko programan, Ahoz Aho dugu berriz ere saiorik parekideena. Honetan ez dugu topatu emakumerik gabeko eztabaidarik, baina bai gizonik gabeko bat.

Asteroko eztabaida-saioei dagokienez, nabaria da nola ETB2ko 7 Días-en astez aste emakumeen presentzia jaitsi da, eta urtarrilean ez da erdira heldu (% 38,73); saio honetan, mahaitik kanpoko partaidetzan areagotzen da desberdintasuna, aditu eta elkarrizketatu gehienak (ia osoak) gizonak baitira. Euskarazko programan, ere, ez da parekidetasunik lortzen, eta Ahoz Aho + solasaldian (%25), emakumeen presentzia gizonenaren herena baino ez da; azterturiko egunetako batean (urtarrilaren 9an), ez zen emakumerik eseri mahaian.

*Urtarrileko azterketan, laginean saio berri bat sartu dugu: Egun on Euskadi. Eta aurretik ondorioztatu bi emaitza kolokan jarri behar izan ditugu: alde batetik, urtarrilean ez da betetzen emakumeen parte-hartze handiagoa dagoela euskarazko saioetan, eta, beste aldetik, ordutegiaren eragina kolokan jarri behar izan dugu, ia tarte berdinean kokaturiko bi saioen arteko aldea nabaria baita.

Honako grafiko honetan ikus daiteke emakumeen parte-hartzearen eboluzioa hilabetez hilabete:

 

OHARRA: hemen azaltzen diren datuak erabil daitezke, beti ere, iturria aipatuta.

Hego Euskal Herriko egunkarietan, emakumeen iritzi gutxi

Emakumeek sinaturiko iritzi-artikuluak ez dira argitaraturikoen herenera heldu 2018ko urtarrilean gaztelaniazko  paperezko prentsan, eta kopuru horretan geratu da euskarazkoan.

Aurreko neurketetan gertatu den bezala, emakumeen presentzia handiena Berrian dugu. Euskarazko egunkari bakarrean, emakumeek sinaturik 67 artikulu (%33) aurkitu ditugu urtearen lehenengo hilabetetan, eta 136 gizonek sinaturikoak (% 67). Egunero gutxienez emakume baten sinadura topatu dugu, eta horretan ere bakarra da euskal kazeta.

Beste muturrean, aldiz, Diario de Navarra dugu. Egunkari horretan, emakumeen sinadurak guztien % 10a izan dira (200 artikuluetatik 20), eta ikerturiko 29 egunetatik 14etan ez da emakumerik sinatu duen iritzirik argitaratu.

Noticias taldeko Deia eta Noticias de Alava egunkarietan, berriz, iritzia ematen duten emakumeen portzentajea  %16,5 da.  Bizkaikoan, 255 testuetatik 41-k eta Arabakoan, 132tik 22-k andre baten sinadura dute. Bietan, ikerturiko aletatik 6na zenbakitan ez dugu sinatzen zuen emakumerik.

Vocento-ko El Correo eta Diario Vasco egunkarietan, bere aldetik, emakumeek sinaturiko artikuluak iritzi guztien % 23,5 baino ez dira, hau da, ia ia laurdena, baina heldu gabe, parekidetasunetik oso urruti.

Kopurua hobetzen da pixka bat Garan, zeinetan sinatzaileen % 29 emakumeak dira. Baina honetan ere badaude emakume iritzi emailerik gabeko egunak (4 azterturiko denbora-tartean).

Asteburuetan, are gutxiago

Egunkarien erosketari buruzko ikerketek agerian uzten dutenez, asko dira asteburuetan soilik hartzen dutenak, astean zehar baino ez erosten dutenak baino ez. Gainera, ematen du jaiegunetan irakurtzeko denbora gehiago dagoela. Horrek badakar analisia eta gogoetarako tartea handiagoa izatea, eta, beraz, iritzi-artikuluen kopurua ere igo egin ohi da prentsan.

Kopuru handitze horrek ez dakar, ordea, emakumeen presentzia handiagoa, aitzitik, txikiagoa izan ohi da egunkari guztietan.

Esaterako, emakumerik gabeko 6 egunetatik, 4 igandeak dira Deia eta Noticias de Alava egunkarietan. Azken honetan, bi asteburutan ez dugu andrerik sinaturiko artikulurik. Gauza bera gertatzen da El Correo eta Diario Vasco-ren kasuan: urtarrilaren 20/21 eta 27/28an ez dugu topatzen emakume sinatzailerik. Bestalde, Gararen kasuan, emakumeen portzentajea 9 puntu jaisten da (%20 izan ohi da) asteburuetan, eta nabarmen murrizten da Berriaren kasuan, zeinetan %21,5 era jausten den.

Hurrengo grafikoetan ikus daiteke egunez egun, zein izan den emakumeen eta gizonen presentzia iritzi-orrialdeetan zein gaurkotasuneko analisietan*

 

 

 

* azterketa honetatik kanpo geratzen dira ekonomia, kultura eta kirol ataletan zein gehigarrietan argitaraturiko artikuluak.

OHARRA: hemen azaltzen diren datuak erabil daitezke, beti ere, iturria aipatuta.